صفوت كرم: دخلونا الحجز كلنا انا وابنى والعامل وابتدى الضرب والشتيمة من الضباط والمخبرين

ثلاثاء, 15 Mar, 2016

صفوت كرم نسيم
صفوت كرم نسيم

 

صفوت كرم نسيم اسعد فهمى غانم، 56 سنة، المانى الجنسية من اصل مصرى، مترجم وكاتب

خلفية

صفوت عايش فى المانيا من 1988، متزوج ولديه ولد. يعانى من امراض الضغط والسكر وفقرات العنق والظهر. طلع معاش مبكر بسبب المرض، ارسل ابنه الى مصر لتعلم العربية.. يتنقل مابين مصر والمانيا كل عدة شهور خلال السنوات الأخيرة. يسكن فى مصر فى فيلا فى ابويوسف العجمى حيث يمتلك شقق ومقهى ويبنى معرض تجارى.

صفوت لايقبل الرشاوى والتلاعب بالقوانين ولهذا السبب له خلافات كثيره مع المقاولين، ويقول ان المقاولين على علاقة طيبه بظباط القسم، وان رئيس المباحث خالد السقا لفق له عدة قضايا ارضاء للمقاول وآخرين. وانتهت كل القضايا بالحكم ببرائته من التهم المنسوبة له. اتهموه مره بتشغيل تلفزيون بدون ترخيص، فى مقهى يملكها ولكنه يؤجرها للغير. وفى قضية اخرى اتهموه بالتعدى على سيده تحمل طفل وتسبب فى حرق ذراع الطفله. وبسبب بلاغات كيدية احتجزوه فى قسم العامرية عدة مرات فى القسم.

آخر واقعه كانت بتاريخ 3 سبتمبر 2015

يوم الخميس 3 سبتمبر الساعه 9 مساء، ببص من البلكونه لقيت تمناية (سوزوكى 7 راكب)، نزل منها خمس ست اشخاص وبيدورا على باب الفيلا بكشاف كهربا، افتكرتهم حرامية، نزلت لهم، قالوا احنا مباحث قسم العامرية، وطلبت مايثبت، فالظابط ورانى كارنيه وعرفت انه معاون مباحث وان اللى معاه مخبرين القسم. وقال لى عايزينك خمس دقايق فى القسم، طلبت منه اخد الدوا بتاعى، ماانا عارف الخمس دقايق بتاعتهم، الظابط رفض وفتشونى وانا فى الشارع واخدوا الموبايل بتاعى ولقوا معايا دوا الضغط، الظابط قال لى ارمى الدوا ده احسن اعمل لك قضية تعاطى. ندهت على ابنى وقولت له هات لى الدوا على القسم بكره، الظابط قال احنا عايزين ابنك كمان، اول مانزل ماريو ابنى مسكوه على طول بعنف ورفضوا انه يلبس هدوم الخروج ورفضوا انه يقفل الفيلا، بالعافية قدر يقفل البوابة الحديد الخارجية، كنا خايفين الفيلا تتسرق.

دخلنا القسم لقينا العامل اللى شغال فى المعرض بتاعى، متعور فى راسه، وبياخده اقواله ومتهم ابنى انه ضربه بالمنشار فى راسه لما جه يطلب منى فلوسه، انا قولت ان ده ماحصلش وانه بيعمل كده عشان يبتزنى وياخد فلوس اكثر، ده بلاغ كيدى. دخلونا الحجز كلنا انا وابنى والعامل وابتدى الضرب والشتيمة من الضباط والمخبرين. بقول للضابط انى مااقدرش اقعد فى الحجز انا مريض وقولت له انا المانى وطلبت منه يبلغ السفاره، الظابط رد ح نبقى نطلعك لما تموت ومافيش سفاره انت فى مصر.

الحجز ضيق جدا والعدد فيه من تمينين الى ماية وعشرين سجين وهو مكان بالعافية يساع عشر اشخاص، خلال سبع ايام صرفت حوالى خمس الالاف جنيه رشاوى بس عشان يرضوا يخلونى انام على باب الحجز. ومارضيوش ابدا يدخلوا لى الدوا، ده غير انهم كانوا بيعدونا مرتين فى اليوم. وقت العد لازم نكون مقرفصين وانا ماقدرش اقعد كده ولو اتحركت اضرب، ده غير الشتيمة والاهانه والتلطيش.

اتعرضت نيابة ثانى يوم، ووكيل النيابة وكيل النيابة طلب نتصالح والعامل رفض. طلب تحريات المباحث ورجعنا تانى على القسم، ولما اشتكيت له انهم رافضين يدخلوا الدوا قال ده موضوع بينك وبين القسم. ثالت يوم اتعرضنا تانى وجاءت تحريات النيابه تنفى صحة الواقعة ووكيل النيابه امر باخلاء سبيلنا.

رجعنا على القسم وماخرجوناش قالوا لازم نتعرض على الامن الوطنى. فضلوا سايبنا ملطوعين لغاية يوم 8 سبتمبر، كان فيه تفتيش من المديرية بالصدفه، قدرت اقول لرئيسهم انى المانى وان احتجازى مخالف للقانون، اهتم وكتب اسمى. فى نفس اليوم اتعرضنا على الامن الوطنى. خرجوا ابنى والعامل فى نفس اليوم، وانا خرجت فى تانى يوم.

لما خرجنا ابنى اصر يرجع المانيا، وانا عملت شكاوى فى تفتيش الداخلية وعند النائب العام وماحدش سأل فيا. اليومين دول بدأت انشر فى الصحف، فبعتوا لى يحققوا فى الشكوى بتاعتى ودوخونى من مكان لمكان. العامل اللى متهمنى سحب كل الكلام اللى قاله عليا وشهد معايا انهم احتجزونى فى القسم بدون وجه حق

ملحوظة: المكتوب على البطاقة التي يحملها صفوت باللغة الألمانية: هذا الشخص يعاني من إعاقة شديدة

وسوم: